استنكرت الإعلامية بسمة وهبة، حادث التحرش الجماعي بـ”فتاة المنصورة” ليلة رأس السنة، وذلك خلال حلقة الأمس من برنامج “كل يوم” المذاع على قناة “أون” الفضائية.
فعلق وهبة قائلة “محتاجين نكتب ونقول كفاية نضحك على نفسنا، بالمقولة بتاعت شعب متدين بطبعه، هل محتاجين نصرخ بعلو صوتنا ونقول في إيه يا مصريين جرى لكم إيه، الحقيقة المشهد على السوشيال ميديا بعد واقعة المنصورة، ومشهد التحرش الجماعي بتاع ليلة رأس السنة، يعتبر قلم على وش المجتمع ده، لازم يوقفنا كلنا قدام المراية عشان نواجه نفسنا ومشاكلنا ونحلها”.
وأردفت بسمة وهبة قائلة ” مهو مش معقول في عز تحركات الدولة ورئيسها في تمكين المرأة وتكريمها، والاعتراف بدورها وعظمته في دعم البلد دي، يجي شوية ناس شباب متهور يحطوا تراب أمراضهم النفسيه فوق الصورة الحلوة اللي بنعيشها”.
وتابعت “أنا مش هسمي اللي حصل بحادثة تحرش، الموضوع أكبر من كده، إحنا قدام جريمة ترويع شارك فيها بالفعل أكثر من 100 شاب من المؤكد إنهم هما دول الناس اللي بتكتب آيات قرآنية على الفيس بوك، وبينظروا على الناس، وبيعملوا سبع رجالة على والدته وأخته”.
واضافت وهبة “شارك في الجريمة دي مئات من مشايخ التيار السلفي ومدعي التدين اللي فضلوا يزرعوا في عقول الشباب إن المرأة فتنة، وأي ست بيتم التحرش بيها مش ضحية هي الجاني تحت شعار تستاهل وهي إيه اللي خلاها تلبس كده، وأكثر شيء خوفني على السوشيال ميديا تعليقات ستات بتقول تستاهل إيه اللي خلاها تلبس كده”.
شاهد فيديو..