روت الإعلامية بسمة وهبة، كيف تم إنقاذ حياتها من موت محقق ليلة الأمس، بسبب الدفاية الكهربائية، وذلك خلال حلقة الأمس من برنامج”كل يوم” المذاع على قناة “one” الفضائية.
فسرد وهية تفاصيل ما حدث قائلة “نصحت غيري ونسيت نفسي، من أسبوعين بعد وفاة والد الفنان إيهاب توفيق بسبب الدفاية طلعت أحذر الناس من الدفاية وأخطاراها، وطرق استخدامها، ونشد الفيشة قبل ما ننام، وأهم حاجة المشترك، واللي حصل، إن أنا اللي أتكوي بنار الدفاية والمشترك”.
وأردفت وهبة “أنا كنت فاهمه إن المشترك بتاعي مستورد يعني كويس، بس واضح إن الرقابة بعافية شوية، يوم حلقة الدفاية عملت فيها تلميذة شاطرة وقلتلهم في البيت هاتولي بلاطة تكون متر في متر ونحط عليها الدفاية، ونسيت أهم حاجة، وهي إنه لازم ننقي المشترك اللي هنحط فيه الدفاية، لأنه هو السبب الرئيسي في حوادث الدفايات”.
وتابعت “ما حدث بالأمس كالأتي: أنا دخلت أنام وسبت الدفاية اللي في أوضة النوم شغالة، ونمت، قلقت على صوت حاجة بتطق، فتحت عيني لقيت نور، دققت شوية لقيتها حريقة، لقيت سلك المشترك سايح ومولع، والنار شابكة في الأرض”.
وأضافت “الحمد لله جوزي صحي، وبسرعة طفينا الحريق، وأنا جبت ماية ودي كارثة طبعا، جوزي قالي أوعي تدلقي ماية، هو حط فوط وبشاكير النار هبطت واتطفت، بعد الشر لو حصلكم كده أوعى تطفوا النار بماية، أو حاجة فيها بوليستر”.
وأكملت “الحمدلله من كرم ربنا ولطفه إنها عدت على خير لأن في حالات كتير بتموت، أنا دخلت المستشفى وخدت أكسجين، لأن الدخان لما بيدخل بيقلل الأكسجين في الرئة، وده بيبقى سبب موت ناس كتير”.
شاهد الفيديو…